José María Gabriel y Galán

VARÓN

 Poema siguiente


¡Me jiedin los hombris
que son medio jembras!
Cien vecis te ije
que no se lo dieras,
que al chinquín lo jacían marica
las gentis aquellas.
Ahora ya lo vide, y a mí no me mandis
más vecis que güelva.
Te largas tú a velo,
que pue que no creas
que tu cuerpo ha parío aquel mozu,
ni que lo cebasti con tu lechi mesma,
ni que tieni metía en la entraña
sangri de mis venas.
N'amás de mimarros
y delicaezas
que ha queao lo mesmo que un jilo
paliúcho y sin chispa de juerza.
Ca instanti se lava,
ca instanti se peina,
ca instanti se múa
toa la vestimenta,
y se encrespa los pelos con jierros
que se lo retuestan,
y en los dientis se da con boticas
de unos cacharrinos que tieni en la mesa,
y remoja el moquero con pringuis
n'amás pa que güela
¡Jiedi a señorita
dendi media lengua!
Se levanta a las nuevi corrías
y a las doci lo mesmo se acuesta.
¡Va a ponersi pochu
si acotina de aquella manera!
¡Güeno está pa mandalo a bellotas,
pa ayualmi a escuajal en la jesa,
pa jacel un carguju de tarmas
y traelo a cuestas,
u pa estalsi cavando canchalis
dende que amaneci jasta que escurezca!
Los muchachos de acá me esconfío
que mos lo apedrean
cuantis venga jaciendo pinturas
u jablando de aquella manera:
y verás cómo el mozu no tieni
ni agallas ni juerza
pa el primero que quiera molarsi
rompeli la jeta.
Ya no dici padri,
ni madri, ni agüela.
«Mi papá, mi mamá, mi abuelita...»
así chalrotea,
como si el mocoso juesi un señoruco
de los de nacencia.
Ni mienta del pueblo, ni jaci otro oficio
que dil a una escuela
y palral de bobás que allí aprendí,
que pa na le sirvin cuantis que se venga.
Pa sabel sus saberis le ije:
«Sácame la cuenta
del aceiti que hogaño mos toca
del lagal po la parti que es nuestra.
Se maquilan sesenta cuartillos
p'acá parti entera,
y nosotros tenemos, ya sabis,
una media tercia
que tu madre heredó de una quinta
que tenía tu agüela Teresa».
¡Ya ves tú que se jaci en un verbo!
Sesenta la entera,
doci pa la quinta,
cuatru pa la tercia,
quita dos pa una media, y resultan
dos pa la otra media.
Pues el mozu empringó tres papelis
de rayas y letras,
y pa ensenrearsi
de aquella maeja,
ijo que el aceiti que a mí me tocaba
era «pi menus erre», ¿te enteras?
¡Pus pués dil jacindu
las sopas con ella!
¿Y esos son saberis?
¡Esas son fachendas!
No le quise mental del guarrapo
ni icile siquiera
que hogañazo vendimus el churru
pa comprar un cachuju de tierra.
¡Allí no se jabla
de esas cosas ni en ellas se piensa!
N'amás que se jaci comel confituras,
melcal vestimentas,
dirse a los cafesis,
dirse a las comedias
y palral de bobás que no valin
ni siquiá una perra
¡Jolgacián como el nuestro muchacho
no va a haberlo, si aquí no se enmienda!
Yo no lo distingo de otros señorinos
que con él se ajuntan y jolgacianean.
¡Son como maricas!
¡Juy, qué vestimentas!
Ves una persona
por detrás, en la calle, tan tiesa
y endi lejus no sabis de cierto
si es macho u es jembra.
Güelin a lo mesmu
como las ovejas,
y p'aquí no es asín, que ca cosa
güeli a su manera:
güeli a macho la carni de hombre,
y la carni de jembra da a jembra.
Hay que dil a buscar al muchacho
cuantis que se puea,
y le dicis a aquellos señoris
que esu no quita pa que se agraeza,
pero que a su padri le jaci ya falta;
y asín se la enreas.
No lo quió jolgacián, aunque muchos
saberis trujiera.
Y no es esu solu lo que a mí me enrita,
que otras cosas me jacin más mella...
Hay que dil a buscalo ca y cuando:
que venga, que venga;
porque, mira: ¡me jiedin los hombres
que son medio jembras!...

Poema siguiente 

 Volver a
José María Gabriel y Galán

Comentarios5

  • Luis Rincón Casillas Tengo 70 años. De joven me sabía este poema de memoria y me gustaba recitarlo.Nací en la región de La Vera del Tiétar y he conocido a algunas personas que todavía se podrían identificar con el protagonista del poema.Considero VARÓN, EL EMBARGO, SIBARITA, y otras más de Gabriel y Galán, joyas 'arqueológicas' de incalculable valor.
  •  
    mayrah1304 Um poema especial!
  •  
    Elsy Alpire Vaca Hay, me costó leerlo, más entenderlo pero pronto me di cuenta que es una expresión del pasado, quizá cuando era yo nila, mucha gente hablaba así, pero lo importate es el gran mensaje que encierra y con eso vemos cómo ha evolucionado el desarrollo humano. Buenísimo poema.
  •  
    julio j. rivera de la c. Excelente poema ; suigeneris sin lugar a dudas... no cuesta trabajo entenderlo cuando se comprende el verdadero mensaje... buenisimo... saludos desde México.
  •  
    Poemas de Camilo José Maria Gabriel y Galán, el poeta de mi niñez, cuyos poemas conservo en la memoria como joyas de mi infancia: El Ama: Yo aprendi en el hogar donde se funda / la dicha más perfecta, / y para hacerla mia / quise yo ser como mi madre era". --- Soy castellano pero el recuerdo de sus "Extremeñas" todavia me emocionan: El Cristu benditu, El deshauciado, El embargo... "Señol jues, pasi usté más alanti / y que entrin tos ésos; / no le dé a usté ansia, / no le dé a usté mieo... / Si venís antiayel a afligila, / sos tumbo a la puerta. ¡Pero ya s`ha muerto! / Embargal, embargal los
    avios, / que aqui no hay dinero;" (...) El poeta de mis ilusiones castellanas y extremeñas.
    Ego sum
  • Debes estar registrado para poder comentar. Inicia sesión o Regístrate.